Буюк Британия бош вазири Киевга тинчликпарвар кучларни юбориш масаласини муҳокама қилиш учун келади - ОАВ

Кир Стармер олти ой аввал Британия бош вазири лавозимига киришганидан бери илк бор Украинага ташриф буюриб, уруш тугаганидан кейин Британия қўшинларини тинчликпарвар кучлар таркибига киритиш имкониятини муҳокама қилади, деб ёзади Bloomberg.

Владимир Зеленский Германиядаги Рамштейн авиабазасида иттифоқчилар билан учрашувдан кейин режалаштирилган ташриф ҳақида гапирди. Унинг сўзларига кўра, британияликлар Россия билан уруш тугаганидан кейин Украинага тинчликпарвар кучларни юбориш режаларига "ижобий муносабатда".

Учрашув яқин ҳафталарда бўлиб ўтиши кутилмоқда, дея аниқлик киритмоқда агентлик.

Шунингдек, Bloomberg манбасига кўра, 9 январь куни Стармер ўз уйида Франция президенти Эммануэл Макрон билан учрашган ва сиёсатчилар Украинада тинчликпарвар кучларни яратиш имкониятларини муҳокама қилган.

Аввалроқ Reuters агентлиги таҳлилчиларнинг ҳисоб-китобларига таяниб, Украинадаги европалик қўшинлар сони 40 дан 100 минг кишигача бўлиши мумкинлигини, уларнинг асосий қисмини Франция, Германия, Италия, Польша ва Буюк Британия ҳарбийлари ташкил этиши ҳақида ёзган эди.