Буюк Британия болалар ва ўсмирларга ижтимоий тармоқлардан фойдаланишни тақиқлашни режалаштирмоқда

Буюк Британия ҳукумати болалар ва ўсмирлар томонидан ижтимоий тармоқлардан фойдаланишни чеклаш бўйича маслаҳатлашув ўтказади ва мактабларда смартфонлардан фойдаланишни тақиқлашни кучайтиради.

Бу ҳукуматнинг расмий веб-сайтидаги баёнотда эълон қилинган.

"Ҳукумат ёшларнинг фаровонлигини ҳимоя қилиш ва хавфсизроқ онлайн тажрибани таъминлаш учун болаларнинг ижтимоий тармоқлардан фойдаланиши ва мактабларда телефонлардан фойдаланишни тақиқлаш бўйича маслаҳатлашувни бошламоқда", дейилади баёнотда.

Буюк Британия расмийлари ижтимоий тармоқлардан фойдаланиш учун минимал ёшни белгилашни муҳокама қилади ва шунга ўхшаш чекловларни жорий қилган мамлакатлар тажрибасини баҳолайди.

Reuters агентлигининг хабар беришича, ушбу мавзу бўйича маслаҳатлашувлар 19 январ, душанба куни бошланган. Нашрнинг хабар беришича, Буюк Британия ҳукумати вакиллари 2025 йил декабрь ойида 16 ёшгача бўлган болалар томонидан ижтимоий тармоқлардан фойдаланишни тўлиқ тақиқлаган Австралияга ташриф буюришни режалаштирмоқдалар. Британия расмийлари томонидан кўриб чиқилаётган ёш чегараси ошкор қилинмаган.

Австралия 16 ёшгача бўлганлар учун ижтимоий тармоқлардан фойдаланишни тақиқлаган дунёда биринчи мамлакат бўлди. Мамлакат парламенти томонидан 2024 йил ноябрь ойида қабул қилинган қонун 2025 йил 10 декабрда кучга кирди.