Бухоролик ота болалари учун олдиндан 145 млн сўм алимент тўлади

Қонуний чекловлар қарздор оталарни олдиндан алимент тўловини амалга оширишга ундамоқда.

Бухоро вилояти, Жондор туманида яшовчи фуқаро Р.Ч. турмуш ўртоғи Н.Ш. билан бир неча йил муқаддам ажрашган. Ажрашгандан сўнг, у вояга етмаган икки нафар фарзандининг моддий таъминоти учун алимент тўлаб келган.

Сўнгги вақтларда алимент тўловидан қарздорлик учун қатор қонуний чекловлар жорий этилгани Р.Ч.ни ҳам масъулиятни янада жиддий қабул қилишга ундаган. Жумладан, алимент қарздорлиги мавжуд бўлганда чет элга чиқиш ёки хорижда ишлаш имкониятлари чекланиши мумкинлиги уни ўйлантирган.

Шу сабабли, у собиқ турмуш ўртоғи Н.Ш. билан ўзаро келишувга эришиб, келгуси 5 йил учун алимент тўловларини олдиндан амалга оширган.

Мажбурий ижро буюроси жамоатчилик билан алоқалар ва ҳуқуқий ахборот бўйича катта инспектори Ихтиёр Олимовнинг «Xabar.uz»га маълум қилишича, келишувга мувофиқ, қарздор ота томонидан икки нафар фарзанднинг таъминоти учун жами 145 миллион сўм алимент пулларини АҚШ доллари кўринишида тўланган.

Бундан ташқари, у фарзандлари учун 3 жуфт тилла зирак ва 3 дона тилла узукни ҳам ҳадя қилган.