"Будапешт тинчлик учрашуви ўтказиш учун энг яхши жой эмас"

Зеленский Украина қўшинлари Донбассдан олиб чиқилмаслигини яна бир бор таъкидлади. "Россиянинг талабларига қарамай, Донбассда ортга чекинмаймиз. Нуқта", — деди Украина президенти журналистлар билан мулоқотда.

Владимир Зеленскийнинг бошқа баёнотлари:

◾️ Путинга Донбасснинг ўзи керак эмас, бу фақат “муваффақият иллюзиясини яратиш усули”. Бироқ ҳеч ким бир неча йилдан сўнг унинг яна олдинга юрмаслигига кафолат бера олмайди;

◾️ Покровск йўналишида вазият оғир, Купянскда эса ҳолат бироз яхшиланган;

◾️ Украина ҳар йили Patriot тизимларини олади, ҳозирча 25 та тизим учун шартнома тайёрланмоқда;

◾️ Ҳозирги кунда Украина 28 та давлат билан икки томонлама хавфсизлик битимларига эга;

◾️ Менимча, президент Трамп руслар билан учрашув олдидан зиддиятни кучайтиришни истамаяпти, шунинг учун Украинага Tomahawk'лар бериш масаласида ҳали аниқ қарор қабул қилинмаяпти;

◾️ Будапешт тинчлик учрашуви ўтказиш учун энг яхши жой эмас, чунки Венгрия бош вазири Виктор Орбан доим Украинага тўсқинлик қилиб келади;

◾️ Агар мени Трамп ва Путиннинг учрашувида қатнашиш учун Будапештга таклиф қилишса, албатта бораман;

◾️ Суҳбатлар чоғида Россиянинг ҳудудлар алмашинуви бўйича ҳақиқий ниятини аниқлашга уриндим, аммо уларнинг аниқ позицияси ҳанузгача номаълум;

◾️ Путин Трампга Tomahawk'лар масаласи ва унинг риторикаси сабабли қўнғироқ қилган. Руслар АҚШ президентининг бу ракеталар бўйича қароридан қўрқмоқда, бу аниқ;

◾️ Россия яна “Украина янги ҳужумга тайёргарлик кўраяпти” ва “ўт очишни тўхтатишга тайёр эмас” деган сохта ривоятни илгари сурмоқда;

◾️ Ҳиндистон Россия энергия ресурсларини камроқ сотиб ола бошлади, аммо бу маълумот ҳали тасдиқланиши керак;

◾️ Путин Россия ресурсларидан ўз манфаати йўлида фойдаланиб Қўшма Штатларга таъсир ўтказмоқда, Украина эса ўзини сотмайди. Бу икки мамлакат ўртасидаги асосий принципиал фарқ.