Британиялик 57 ёшли эркак дунёни пиёда айланиб чиқиб, 28 йилдан сўнг уйига қайтди

Британиялик Карл Бушби 1998 йил ноябрь ойида бошлаган ғайриоддий саёҳатини якунлаш арафасида. У 28 йил давомида 50 минг километрдан ортиқ масофани босиб ўтиб, 29 та мамлакатни кесиб ўтди. Саёҳатчи Буюк Британияга фақат пиёда ёки сузиб етиб боришни мақсад қилган.

Саёҳатнинг сўнгги тўсиғи Ла-Манш бўғози бўлди. 5 октябрь, душанба куни Бушби Франциядан сузиб ўтиб, Дувр яқинидаги Англия қирғоғига етиб келди. Сувдаги сафар тахминан 20 соат давом этган бўлиб, уч кунга тақсимланган. Қирғоқда уни отаси, ака-укалари ва дўстлари кутиб олди. Саёҳатчининг қайтишини у ҳақда ҳужжатли фильм суратга олаётган немис режиссёри Вернер Ҳерцог ҳам кузатиб борди.

Собиқ десантчи Бушби йўлга чиқишдан олдин иккита қоида белгилаган: ҳаракатланиш учун транспорт воситаларидан фойдаланмаслик ва ўз кучлари билан уйига етмагунча қайтмаслик. У барча буюмларини «Махлуқ» деб номланган аравачасида олиб юрган.

Саёҳат у кутганидан анча кўп вақт олди. Виза билан боғлиқ муаммолар, 2008 йилги жаҳон молиявий инқирози ва коронавирус пандемияси унинг режаларини жами тахминан 14 йилга кечиктирди. Масалан, Аляскадан Россияга Беринг бўғози орқали ўтганидан кейин Россия ҳукумати унга узоқ вақт виза бермаган.

Шунга қарамай, саёҳат ҳали тўлиқ якунлангани йўқ. Бушби Англиянинг шимолида жойлашган туғилиб ўсган Ҳалл шаҳрига етиб бориши учун яна тахминан 400 километр йўл босиб ўтиши керак.