Британия ҳарбий разведкаси маълумотига кўра, Украинадаги уруш давомида тахминан 500 минг нафар россиялик ҳарбий ҳалок бўлган. Бу ҳақда Британия Қуролли Кучлари раҳбари Рич Найтон маълум қилди.
Унинг баҳосига кўра, 2022 йил февралидан буён Россия қўшинларининг ҳалок бўлганлар ва ярадорларни ўз ичига олган умумий талафоти тахминан 1,5 миллион кишини ташкил этган. Найтоннинг таъкидлашича, талафотларнинг мутлақ кўпчилиги 2023 йил январидан кейин содир бўлган.
Британия Қуролли Кучлари раҳбарининг айтишича, бундай катта талафотлар Россия қўшинларининг Украина ҳудудининг атиги тахминан 2 фоизини эгаллаши эвазига юз берган.
«Менимча, бу рақамлар бундай арзимас ҳудудий илгарилаш учун инсон ҳаётининг қанчалик бемаъни ва самарасиз сарфланаётганини яққол кўрсатади», — деди Найтон.
Тахминан 500 минг нафар россиялик ҳарбий ҳалок бўлгани ҳақида гапирар экан, у ҳар бир рақам ортида энди отаси, ўғли, акаси ёки эрини кўра олмайдиган оилалар турганини таъкидлади.
Найтоннинг сўзларига кўра, уруш Россия иқтисодиётига ҳам катта зарар етказган. У иқтисодий ўсишнинг секинлашиши, истеъмол талаби пасайиши ва юқори инфляция сақланиб қолишига олиб келган.
«Россия иқтисодиёти, шунингдек, унинг аҳолисининг фаровонлиги ва келажак истиқболлари учун тўлов жуда катта», — деди Британия Қуролли Кучлари раҳбари.
Шу билан бирга, манба келтирган Ғарб расмийлари Россия қўшинларининг катта талафотлари ёки иқтисодий босимнинг кучайиши Россия президенти Владимир Путиннинг Украина бўйича мақсадларини ўзгартирганига ҳеч қандай белги кўрмаётганини билдиришган.
Буқа 300 минг долларга сотилди
Сунъий интеллект қачон "қайтиб бўлмайдиган нуқтага" етиши мумкинлиги маълум бўлди
Никоҳ ёшига етмаганларга фақатгина иккита узрли сабаб билан оила қуришга рухсат берилади
