BBC: АҚШ Конгрессидаги демократлар Эпштейнга унинг 50 йиллик юбилейи муносабати билан Трамп томонидан юборилгани айтилаётган хат нусхасини эълон қилди

Нашрнинг ёзишича, Эпштейннинг меросини бошқараётган юристлар ўтган ойда Конгресс Вакиллар палатаси назорат қўмитаси талаб қилган ҳужжатларни тақдим этишган эди. Шундан сўнг, қўмита таркибидаги демократлар ушбу мактуб нусхасини X ижтимоий тармоғида эълон қилди. Оқ уй эса хатдаги имзо Доналд Трампга тегишли эмаслигини маълум қилди.

Июл ойида The Wall Street Journal ушбу табрикномага оид маълумотни биринчи марта эълон қилганида, Доналд Трамп бу хабарни "фейк" деб атаган ва бундай мактубни ёзмаганини айтган эди. Шунингдек, Трамп ушбу мақолани чоп этган The Wall Street Journal газетаси, мақола муаллифлари ва газетанинг эгаси Рупер Мердокни судга берган эди.

"Президент Трамп бу суратни чизмаган ва бу хатни имзоламаган. Унинг ҳуқуқшунослари мазкур масалада суд жараёнини қатъий давом эттиради", — деди Оқ уй матбуот котиби Кэролайн Ливитт.