“Аёллар дафтари”да рўйхатда турган хотин-қизларнинг мурожаатлари ўрганиб чиқилди

Жорий йилнинг 23 январь куни жиноят ишлари бўйича Мирзо Улуғбек туман судининг раиси ва судьялари томонидан тумандаги маҳаллаларда “Аёллар дафтари”га киритилган хотин-қизлар билан давра суҳбатлари ўтказилди.

Хотин-қизлар, маҳалла фуқаролари, фаоллар ва ички ишлар ходимлари иштирок этган мазкур давра суҳбатларида “Аёллар дафтари”да рўйхатда турган хотин-қизларнинг ҳуқуқий масалалар юзасидан мурожаатлари ўрганиб чиқилди.

Тумандаги Пробация гурухи билан ҳамкорликда “Аёллар дафтари”га киритилган аёлларнинг жазони ижро этаётган фарзандлари ва турмуш ўртоғларини ЖКнинг 73-моддасига асосан жазодан муддатидан илгари шартли равишда озод қилиш тўғрисида тақдимномалар киритиш масаласи муҳокама қилинди.

Шунингдек, хотин-қизларга ЖКнинг 74-моддасига мувофиқ жазони енгилроғи билан алмаштириш, судланганлик ҳолатини тугалланиши ёки олиб ташланиши тартиби ҳақида тушунтиришлар берилди.

Тадбир иштирокчиларига Ўзбекистон Республикаси Вазирлар Маҳкамасининг 2021 йил 8 январдаги “Хотин-қизларни ижтимоий қўллаб-қувватлаш бўйича қўшимча чора-тадбирлар тўғрисида”ги қарори ва ушбу қарор билан тасдиқланган “Аёллар дафтари”ни юритиш бўйича вақтинчалик тартибнинг мазмун ва моҳияти тушунтириб ўтилди.

Сайёр учрашувда туман ҳудудида содир этилган жиноятчилик ва ҳуқуқбузарликлар, Тошкент шаҳрида жиноятларни жиловлаш, жиноятчилик профилактикасини янада такомиллаштириш, одил судловни таъминлаш ва коррупциядан ҳоли ҳудудга айлантириш бўйича “Йўл харита”сининг ижроси, “Менинг маҳаллам – менинг судьям” ғояси, ёшлар ва тадбиркорлик субъектларининг ҳуқуқлари ва қонуний манфаатларини бузилиши ҳолатларини олдини олиш юзасидан ҳам маъруза қилинди.

Давра суҳбати давомида аёлларга ўзларини қизиқтирган масалалар юзасидан тегишли ҳуқуқий тушунтиришлар берилди.