АҚШ ҳукумати ходимларига хитойликлар билан ишқий муносабатлар ўрнатишни тақиқлади

АҚШ ҳукумати Хитойдаги ўз давлат хизматчиларига Хитой фуқаролари билан ишқий муносабатлар ва жинсий алоқалар ўрнатишни ман этди. Бу ҳақда вазиятдан хабардор манбаларга асосланиб, Associated Press хабар бермоқда.

Тақиқ давлат сирларига кириш ҳуқуқига эга бўлган хизматчилар ва уларнинг оила аъзоларига тегишлидир.

Қарор 2025 йил январида АҚШнинг Хитойдаги элчиси Николас Бёрнснинг истеъфога чиқиши арафасида қабул қилинган. Тақиқ АҚШнинг материк Хитойдаги барча дипломатик ваколатхоналарини, жумладан Пекиндаги элчихона ҳамда Гуанчжоу, Шанхай, Шенян ва Ухандаги консулликларни, шунингдек Гонконгдаги консулликни қамраб олади. Аллақачон муносабатлари мавжуд бўлган ходимлар бундан мустасно - улар тақиқдан озод этилиш учун сўров юборишлари мумкин. Рад этилган тақдирда, улар ё муносабатларини тўхтатишлари, ё лавозимларини тарк этишлари лозим бўлади.

Конгресс аъзолари аввалги чекловларнинг етарлича қатъий эмаслигидан ташвиш билдирганидан сўнг бу чоралар жорий этилди. 2024 йил июлда АҚШ элчихонаси ва Хитойдаги бешта консулликда қўриқчи ва бошқа ёрдамчи ходим сифатида ишлайдиган хитойликлар билан муносабатларни янада қаттиқроқ чеклаш қабул қилинган эди. Бироқ Бёрнс буни Хитой фуқаролари билан ҳар қандай алоқани бутунлай тақиқлашгача кенгайтирди. Қоидаларнинг қатъийлаштирилишига Хитой махсус хизматларининг фаоллашуви сабаб бўлди. Разведка манбаларига кўра, Хитой ҳокимияти махфий маълумотларни қўлга киритиш учун "асал тузоқ" тактикасидан фаол фойдаланмоқда. Хитойдаги америкалик дипломатлар бундай ёллаш уринишларига қарши курашиш учун махсус тайёргарликдан ўтмоқда.

Давлат департаменти ички кўрсатмаларга изоҳ беришдан бош тортди, Миллий хавфсизлик кенгаши эса саволларни Давлат департаментига йўналтирди. Хитой Ташқи ишлар вазирлиги ҳам янги тақиқ ҳақида аниқ фикр билдирмади.