Австралия армиясига тарихда илк бор аёл киши қўмондонлик қилади

Тарихда биринчи марта аёл киши Австралия армиясини бошқаради. Бу ҳақда Австралия ҳукумати маълум қилди, деб ёзади Reuters.

Бирлашган кучларнинг ҳозирги бошлиғи генерал-лейтенант Сюзан Койл июль ойида қуруқликдаги қўшинлар бошлиғи бўлади. У генерал-лейтенант Саймон Стюартнинг ўрнини эгаллайди.

Агентлик таъкидлаганидек, тайинлов Австралия қуролли кучларининг ўз сафларида аёл офицерлар сонини кўпайтиришга интилиши фонида содир бўлмоқда, чунки армия мунтазам жинсий зўравонлик ва камситиш бўйича айбловлар тўлқинига дуч келмоқда.

"Июль ойидан бошлаб Австралия армияси тарихида биринчи аёл штаб бошлиғи лавозимига эга бўламиз," - дейилади бош вазир Энтони Албанезе баёнотида.

Мудофаа вазири Ричард Марлс 55 ёшли Койлнинг тайинланишини "чуқур тарихий лаҳза" деб атади.

"Сюзаннинг ютуғи бугунги кунда Австралия мудофаа кучларида хизмат қилаётган аёллар ва келажакда Австралия мудофаа кучларида хизмат қилиш ҳақида ўйлаётган аёллар учун катта аҳамиятга эга бўлади," - дея қўшимча қилди у.

Бу тайинлов армияда аёл офицерлар улушини оширишга қаратилган сиёсатнинг бир қисми ҳисобланади.

Ҳозирда аёллар Австралия Мудофаа кучларининг тахминан 21%ини, юқори раҳбарлик лавозимларининг эса 18,5%ини ташкил этади.

2030 йилгача аёллар улушини 25%га етказиш режалаштирилган.