Аргентина терма жамоаси юлдузи «Реал»га ўтишни орзу қилишини маълум қилди

«Челси»нинг аргентиналик ярим ҳимоячиси Энцо Фернандес Мадриднинг «Реал» клубига ўтишга тайёр. Бу ҳақда журналист Эдуардо Инда хабар бермоқда.

Аввалроқ «Реал» 25 ёшли жаҳон чемпионига қизиқиш билдиргани айтилган эди. Манбага кўра, Фернандес мадридликларга клубга қўшилиш истаги борлигини етказган. «Қаймоқранглилар» сафида ўйнаш — аргентиналик футболчининг орзуси.

Жорий мавсумда Энцо Фернандес барча мусобақаларда 35 та ўйин ўтказиб, 11 та гол урди ва 4 та голли узатма амалга оширди. Transfermarkt портали унинг бозор қийматини 85 миллион еврога баҳоламоқда.