АҚШнинг Венесуэлага ҳужуми оқибатида 100 киши ҳалок бўлган

Бу ҳақда Венесуэла Ички ишлар вазири Диосдадо Кабельонинг сўзларига таяниб, Reuters хабар берди.

"Бу хиёнаткорона ҳужум бўлди. Ҳозирги пайтда 100 нафар одам ўлдирилгани маълум. Уларнинг кўпчилиги ҳаётини энди бошлаган, бу воқеага мутлақо алоқаси бўлмаган ёшлар эди", деган Кабельо.

Венесуэла ИИВ раҳбарининг маълум қилишича, президент Николас Мадуро АҚШ махсус кучлари томонидан қўлга олиниши чоғида оёғидан жароҳат олган, биринчи хоним Силия Флорес эса бошидан жароҳатланган.

АҚШ расмийлари маълумотига кўра, Каракасга уюштирилган ҳужум давомида тахминан 75 киши ҳалок бўлган. Улар орасида тинч аҳоли вакиллари, шунингдек, Венесуэла ва Куба хавфсизлик кучлари ходимлари бўлган. Бундан ташқари, бир нечта америкалик ҳарбий яраланган.

Куба эса АҚШ билан бўлган тўқнашувларда 32 нафар фуқароси ҳалок бўлганини билдирган. Мамлакат расмийларининг баёнотига кўра, улар Венесуэла сўровига биноан Мадуронинг хавфсизлигини таъминлаётган бўлган.