АҚШда шатдаун: федерал ҳукумат фаолияти қисман тўхтатилмоқда

BBC'нинг хабар беришича, Қўшма Штатлар Сенати федерал харажатларни молиялаштириш бўйича иккита қонун лойиҳасидан ҳеч бирини қабул қилмаган ва 1 октябрдан бошлаб ҳукумат фаолиятининг қисман тўхтатилиши, яъни шатдаун бошланади.

"30 сентябр куни Сенат аввал Демократлар партиясининг ҳукуматни молиялаштиришни давом эттириш ҳақидаги қонун лойиҳасини кўпчилик овоз билан рад этди, чунки демократлар Сенатда кўпчилик эмас. Кейин эса Республикачилар партиясининг қонун лойиҳасини қабул қила олмади, чунки улар Сенатда кўпчилик бўлишига қарамай, етарлича овозга эга эмас. Натижада, 1 октябрдан Қўшма Штатлар федерал идораларнинг бир қисми ишини вақтинчалик тўхтатади", дея ёзмоқда нашр.

Шатдаун туфайли биринчи навбатда миллий боғлар ходимлари, музей ишчилари, транспорт хавфсизлиги агентлари кабилар таътилга чиқарилиши мумкин. Бу эса ҳамма жойда, шу жумладан ҳужжатларни расмийлаштириш жараёнларида кечикишларга олиб келади. Ҳарбийлар, полициячилар, тиббиёт ва махсус хизматлар ходимлари шатдаун вақтида маош олмасдан ишлашади.

АҚШ тарихидаги энг узоқ шатдаун Доналд Трампнинг 1-президентлик муддатида юз берган бўлиб, у 35 кун давом этган ва 2019 йил январда якунланган. Ўша пайтда Трамп маъмурияти ходимларини McDonald's бургерлари билан сийлаган эди, чунки Оқ уй ошпази ҳам таътилга чиқарилганди. Демократлар эса иш ҳақини ололмаган давлат хизматчиларига озиқ-овқат тўпламларини тарқатганди.