АҚШ Хитойга қандай таклиф берди?

АҚШ Хитойга ИИ билан боғлиқ хавфли ҳодисалар ҳақида маълумот алмашишни таклиф қилди.

АҚШ Хитойга сунъий интеллект билан боғлиқ, миллий хавфсизликка таъсир қилиши мумкин бўлган ҳодисалар ҳақида бир-бирини хабардор қилиш механизмини яратишни таклиф қилди. Бу ҳақда Reuters хабар берди.

Ташаббус АҚШ молия вазири Скотт Бессент ва Хитой Давлат кенгаши бош вазирининг ўринбосари Хэ Лифэннинг Нью-Йоркдаги музокараларида муҳокама қилинган.

Вашингтон, шунингдек, сунъий интеллект масалалари, умумий манфаатлар ва технология билан боғлиқ хавфлар бўйича АҚШ–Хитой алоҳида мулоқотини йўлга қўйишни таклиф қилган.

Бессент икки давлат ИИ соҳасида шаффофликни ошириши кераклигини айтди. Унинг таъкидлашича, таклиф этилаётган механизм трансчегаравий оқибатларга эга ёки миллий хавфсизликка таҳдид солиши мумкин бўлган ИИ ҳодисаларида ишлаши мумкин.

Пекиннинг ушбу таклифга муносабати ҳозирча маълум эмас.

Масала 24 сентябр куни Дональд Трамп ва Си Цзиньпин учрашувида муҳокама қилиниши мумкин. Кутилишича, сунъий интеллект савдо, Тайвань ва Эрон масалалари қаторида саммитнинг асосий мавзуларидан бири бўлади.