АҚШ Венгрияга Россияга қарши тақиқловчи санкциялардан бир йил муддатга воз кечди

Қўшма Штатлар Венгрияга Россиядан нефть ва газ сотиб олишни тақиқловчи санкциялардан бир йил муддатга воз кечди.

Бу ҳақда АҚШ давлат котиби Марко Рубио Канадада бўлиб ўтган G7 саммити якунлари бўйича журналистларга маълум қилган.

Унинг сўзларига кўра, Россиянинг энергия таъминотини тўсатдан тўхтатиш Венгрия иқтисодиёти учун "ҳаддан ташқари шикаст" бўлади.

"Қувурлар ва нефть ва газ таъминотига келсак, гап бир йил муддатга воз кечиш ҳақида кетяпти... Бу энергия манбаларидан маҳрум бўлиш Венгрия учун ўта беқарорлик бўлади", деди Рубио.

Давлат котиби Киев билан Украина энергетика тармоғини ҳимоя қилишга ёрдам берадиган қурол етказиб бериш бўйича музокаралар ҳақида ҳам гапирди. "Аммо охир-оқибат, агар бу ускуна ўрнатилгандан кейин бир ҳафта ўтиб йўқ қилинса, муаммо бўлиб қолаверади. Сўнгги икки-уч йил ичида шундай бўлган", - дея қўшимча қилди у.

Рубио, шунингдек, Россия ҳозирда Украинадаги урушни тинч йўл билан ҳал қилишга тайёр эмаслигини, АҚШ ва Россия президентларининг эҳтимолий учрашуви аниқ натижаларга олиб келиши кераклигини таъкидлади.