АҚШ ва Исроил яқин кунларда Эронга зарба беришни қайта бошлаши мумкин

АҚШ ва Исроил яқин кунларда Эронга зарба беришни қайта бошлаши мумкин – The New York Times.

Нашр маълумотларига кўра, Трамп Хитойдан қайтиб келганидан сўнг ўз маслаҳатчиларидан ҳарбий ҳаракатларни янада кескинлаштириш бўйича янги режаларни қабул қилиб олган. Пентагон апрел ойидаги сулҳдан кейин тўхтатиб қўйилган Epic Fury операциясини қайта бошлашга ҳозирлик кўрмоқда.

АҚШ Мудофаа вазири Пит Ҳегсет Конгрессда Вашингтоннинг "агар талаб этилса, кескинлашув бўйича режаси борлигини" маълум қилди.

NYT манбаларининг таъкидлашича, АҚШ ва Исроил айни пайтда ўт очишни тўхтатишдан кейинги давр ичида Эронга эҳтимолий янги ҳужумлар бўйича тайёргарлик кўрмоқда.

Газетага кўра, Эрон ҳарбий инфратузилмасига авиазарбалар беришдан ташқари, АҚШ махсус кучлари иштирокида операция ўтказиш ҳам режалаштирилмоқда. Хусусан, Исфаҳондаги объектдан ядровий материалларни қўлга киритиш ёки йўқ қилишни кўзда тутаётган бўлиши мумкин.

Шу мақсадда Қўшма Штатлар минтақага бир неча юзлаб махсус бўлинма жангчиларини, 50 мингга яқин ҳарбийни, иккита авиаташувчи гуруҳни, ўндан ортиқ қурол-яроғ омборини ва ўнлаб самолётларни жойлаштириб улгурди. Шу билан бирга, АҚШ ҳарбийлари Эрон ўз ракета базалари ва ер ости объектларининг аксариятига кириш имкониятини тиклаб олганини тан олмоқда.

АҚШ разведкасига кўра, Теҳрон Ҳўрмуз бўғози бўйлаб жойлашган 33 та ракета позициясидан 30 тасини яна ўз назоратига қайтарган.Эронда ҳам эҳтимолий урушнинг қайта бошланишига тайёргарлик кўрилаётгани айтилмоқда. Парламент спикери Ғолибоф мамлакат қуролли кучлари "барча зарбаларга тайёр" эканидан огоҳлантирди ва янги ҳужум уюштирилган тақдирда "кутилмаган совға" бўлишини ваъда қилди, дейилади хабарда.