АҚШ ва Европа Эрон келишувининг охирги муддатини август ойи охирига белгилади, акс ҳолда...

АҚШ, Буюк Британия, Германия ва Франция Эрон билан ядровий битим тузиш учун охирги муддат сифатида август ойининг охирини белгилашга келишиб олдилар, акс ҳолда Теҳрон "қаттиқ санкцияларга дуч келади".

Бу ҳақда Axios портали учта манбага таяниб хабар берди.

Нашр суҳбатдошларига кўра, АҚШ Давлат котиби Марко Рубио ҳамда Франция, Германия ва Буюк Британия ташқи ишлар вазирлари душанба куни бўлиб ўтган телефон мулоқоти чоғида Эрон билан ядровий келишувга эришиш учун сўнгги муддат сифатида август ойининг охирини белгилашга келишиб олган. Манбалар таъкидлаганидек, акс ҳолда уч Европа давлати 2015 йилги келишувлар бўйича бекор қилинган БМТ Хавфсизлик Кенгаши санкцияларини янгилайдиган механизмни ишга туширишни режалаштирмоқда.

2015 йилда Эрон, Буюк Британия, Германия, Хитой, Россия, АҚШ ва Франция Теҳроннинг ядровий қурол ишлаб чиқараётгани ҳақидаги Ғарб айбловлари туфайли 2002 йилда бошланган инқирозга барҳам бериб, Қўшма кенг қамровли ҳаракатлар режасини (ЖСПОА) имзоладилар. 2018 йилда АҚШ президенти Доналд Трамп келишувдан чиқишини эълон қилди ва АҚШнинг Эронга қарши барча санксияларини тиклади. Бунга жавобан 2020 йилда Ислом Республикаси ЖСПОА бўйича ўз мажбуриятларини қисқартириш ва Атом энергияси бўйича Халқаро агентлик (МАГАТЭ) инспекторларининг мамлакат ядровий иншоотларига кириши чекланганини эълон қилди.

Эрон ва АҚШ вакиллари 2025 йилнинг апрелидан майигача ядровий дастур бўйича беш раунд маслаҳатлашувлар ўтказди. Музокаралар жараёни 13 июнь куни Исроил томонидан 12 кунлик ҳарбий операция бошлангани ва АҚШнинг Эрон ядровий иншоотларига зарбалар бергани сабабли музлатиб қўйилган эди. Айни вақтда Буюк Британия, Германия ва Франция вакиллари Ислом Республикаси билан музокаралар олиб борди.