АҚШнинг Калифорния жанубий округи федерал суди Давлат департаментига 2027 йилги яшил карта лотереяси — ДВ-2027 дастурини ишга тушириш ва рўйхатдан ўтиш жараёнини бошлашни буюрди. Суд қарорига кўра, аризаларни қабул қилиш 1 ноябрдан кечиктирмай очилиши ва 30 кун давом этиши керак.

«Корthouse News Service» хабар беришича, судья Жинсук Ота 14 октябрь куни дастурни рўйхатдан ўтказиш кечиккани юзасидан Давлат котиби Марко Рубиога қарши киритилган даъво бўйича қарор чиқарган. Даъвони «Ред Игл Ло» юридик компанияси берган.

Қарорга мувофиқ, АҚШ Давлат департаменти рўйхатдан ўтишнинг бошланиш ва тугаш саналарини, электрон ариза топшириш сайтини ҳамда иштирокчиларга қўйиладиган талабларни эълон қилиши лозим. Шунингдек, лотереяда танланган иштирокчиларнинг аризалари белгиланган тартибда кўриб чиқилиши керак.

Суд томонларнинг илтимосини инобатга олиб, дастлабки муддатни икки ҳафтага узайтирган. Даъвогар компания асосчиси Кёртис Моррисоннинг айтишича, қўшимча вақт аризаларни муаммосиз қабул қилишни таъминлаш учун берилган.

Манбада келтирилишича, ДВ-2027 лотереясига аризалар 1 ноябрдан кечиктирмай қабул қилина бошланиши, рўйхатдан ўтиш даври 30 кун давом этиши ва танланган иштирокчиларга 3 декабрдан кечиктирмай хабар берилиши керак. Барча муддатлар АҚШнинг шарқий вақти бўйича белгиланади. Аризаларни қабул қилишнинг аниқ санаси Давлат департаменти томонидан эълон қилиниши кутилмоқда.

Дастурга рўйхатдан ўтиш 2025 йил кузида бошланиши режалаштирилган эди. Бироқ АҚШ Давлат департаменти 5 ноябрь куни иштирок этиш тартиби ўзгартирилаётганини ва янги саналар кейинроқ маълум қилинишини билдирган. 2026 йил август ойида «Ред Игл Ло» дастурни ишга туширишни талаб қилиб судга мурожаат қилган.

Яшил карта лотереяси қандай ишлайди?

АҚШнинг турли миллат вакиллари учун иммиграция визалари дастури иммиграция даражаси нисбатан паст бўлган мамлакатлар фуқароларига ҳар йили 55 мингтагача иммиграция визасини олиш имконини беради. Лотереяда танланиш яшил картани автоматик равишда кафолатламайди: иштирокчилар белгиланган талабларга жавоб бериши ва виза олиш жараёнидан ўтиши шарт.

АҚШ президенти Дональд Трамп аввал ҳам ушбу дастурга қарши чиққан. Манбада қайд этилишича, 2025 йил декабрь ойида у Браун университетидаги отишмада гумон қилинган шахснинг АҚШга келиши билан боғлиқ ҳолатдан кейин дастурни тўхтатишга қарор қилган.

Суд қарори лотерея бўйича рўйхатдан ўтишни қайта бошлашга йўл очади. Бироқ ариза топширишнинг аниқ санаси ва амалий тартиби бўйича