АҚШ расмий равишда Қатардан Трампга совға қилинган самолётни қабул қилди — Associated Press

Қўшма Штатлар мудофаа вазири Пит Ҳегсет Қатар амирининг президент Доналд Трампга совға қилган, қиймати 400 миллион долларга тенг Boeing 747 самолётини расмий равишда қабул қилди, деб хабар бермоқда агентлик Пентагондаги манбага таяниб.

Қайд этилишича, мазкур самолёт АҚШ президентининг махсус лайнери сифатида фойдаланилади.

"АҚШ президентини ташишда ишлатиладиган самолётга қўйиладиган хавфсизлик ва функционал талаблар бажарилишини таъминлаш учун Мудофаа вазирлиги тегишли чораларни кўради", — дея Пентагон матбуот котиби Шон Парнеллнинг сўзларини келтиради Тhe New York Times.

Қатар Трампга “учувчи сарой” дея аталувчи самолётни совға қилмоқчи экани ҳақидаги маълумот май ойининг бошида пайдо бўлган эди. Шу билан бирга, бу самолёт АҚШ президентининг “биринчи борти” (Аir Force One) талабларига жавоб бериши учун деярли тўлиқ қисмларга ажратилиб, қайта йиғилиши, кўплаб хавфсизлик, алоқа ва бошқа тизимлар билан жиҳозланиши керак бўлади. Бу жараён бир неча йил ва миллиардлаб доллар маблағни талаб қилади.

Бундан ташқари, АҚШ қонунчилигига кўра, федерал ҳукумат ходимларига хорижий давлатлардан қиймати 480 доллардан ортиқ бўлган совға қабул қилиш тақиқланган, ундан қиммат совғалар автоматик тарзда давлат мулкига айланади.

Трамп эса, ушбу совғага шубҳа билан қараётган сиёсий рақибларини “фирибгарлар” ва “омадсизлар” деб атаб, бундай туҳфаларнинг ноўринлиги ҳақидаги танқидларни рад этмоқда.