АҚШ Испаниянинг NATO'даги аъзолигини тўхтатиб қўйиш имкониятини кўриб чиқмоқда

Пентагонда Эрондаги ҳарбий амалиётни қўллаб-қувватламаган NATO иттифоқчиларига нисбатан "жазо" чоралари муҳокама қилинмоқда.

Reuters манбасига кўра, мумкин бўлган чоралардан бири — Испаниянинг альянсдаги иштирокини вақтинча тўхтатишдир. Пентагоннинг ички мактубида қайд этилишича, бу қадам Қўшма Штатларнинг ҳарбий амалиётларига сезиларли таъсир кўрсатмайди, бироқ катта "рамзий маънога" эга бўлади.

Ҳозирча NATO'да аъзоликни тўхтатиб қўйишнинг аниқ ҳуқуқий механизми бор-йўқлиги номаълум. Мактубда АҚШнинг альянсдан чиқиши ёки Европадаги базаларини ёпиши кўзда тутилмаган. Ушбу таклифлар европалик иттифоқчиларга "кучли сигнал" юбориш мақсадида ишлаб чиқилгани айтилмоқда.

Испания Бош вазири Педро Санчес бу хабарларга жавобан, Мадрид турли мактубларга эмас, балки фақат расмий ҳужжатлар ва ҳукуматларнинг расмий позициясига таянишини маълум қилди.