АҚШ G7 баёнотидаги Россияга оид ифодаларни янада юмшатмоқчи

АҚШ G7 баёнотидаги Россияга оид ифодаларни янада юмшатмоқчи.

Қўшма Штатлар Канада томонидан илгари сурилган, Россияга нефт нархининг юқори чегарасини четлаб ўтишда ёрдам бераётган “соя флоти”ни кузатиш бўйича махсус гуруҳ тузиш таклифини рад этди. Бу ҳақда Bloomberg ўз манбаларига таяниб хабар бермоқда.

Жорий йилда “Катта еттилик”ка раислик қилаётган Канада келаси ҳафта Квебек шаҳрида ташқи ишлар вазирлари саммитини ўтказишни режалаштирган.

Агентлик маълумотларига кўра, АҚШ денгиз масалаларига оид қўшма баёнотни тайёрлаш жараёнида Хитойга нисбатан ифодаларни кескинлаштириш, Россияга нисбатан эса юмшатиш тарафдори бўлмоқда.

Шунингдек, Вашингтон баёнотдан “санкциялар” сўзини ҳамда Россиянинг Украинадаги ҳарбий ҳаракатларини давом эттириш қобилиятига доир ибораларни чиқариб ташлашни таклиф қилган.

Феврал ойида Financial Times нашри АҚШ G7'нинг Украинага кенг кўламли босқиннинг уч йиллигига бағишланган қўшма баёнотида Россияни “агрессор” сифатида аташга қаршилик қилганини ёзган эди.