Андижонда хорижга чиқиш тақиқини ечиб беришни ваъда қилган банк ходими ушланди

Андижон вилоятида фуқаронинг хорижга чиқиши учун қўйилган тақиқни ечиб беришни ваъда қилган тижорат банки ходими ушланди.

Бош прокуратура ҳузуридаги Департаментнинг Андижон вилояти бошқармаси ҳамда бошқа ҳуқуқни муҳофаза қилувчи органлар ходимлари ҳамкорлигида ўтказилган тезкор тадбирда тижорат банкининг Андижон ҳудудий бошқармаси бош мутахассиси Б.У. ушланган.

Маълум қилинишича, у фуқаро А.А.нинг банк кредити бўйича қарздорлиги сабабли Мажбурий ижро бюроси томонидан қўйилган хорижга чиқиш тақиқини ечиб беришни ваъда қилган. Бунинг эвазига 5,5 млн сўм олган вақтида ашёвий далиллар билан қўлга олинган.

Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари олиб борилмоқда.