Медведев ўзининг Telegram-каналида АҚШда янги санкциялар тўғрисидаги қонун имзоланганини изоҳлар экан, Вашингтон бундай ҳаракатларга фақат «тўғридан-тўғри ҳарбий тийиб туриш тили» билан берилган жавобни тушунишини таъкидлади.
Унинг сўзларига кўра, Европа давлатлари Украинага қурол-яроғ, разведка маълумотлари ва молиявий ёрдам кўрсатиб, Россия билан амалда тўғридан-тўғри уруш олиб бормоқда. Шунингдек, Европа мамлакатлари Россия бизнеси, фуқаролари ва маданий алоқаларига нисбатан кенг кўламли чекловлар жорий қилмоқда, деб даъво қилди Медведев.
Россия Хавфсизлик кенгаши раиси ўринбосари, шунингдек, Ғарб компанияларининг активларини вақтинча бошқарувга беришдан воз кечиб, уларни мажбуран ва товон тўламасдан давлат мулкига ўтказиш зарурлигини айтди. У Ғарб давлатлари «фақат қўпол кучни тушунади», деган фикрни билдирди.
Медведевнинг баёнотлари АҚШ президенти Дональд Трамп томонидан «2026 йилги Линдси О. Грэмнинг Россия ва Эронга қарши санкциялар тўғрисидаги қонуни» имзоланганидан сўнг янгради. Ҳужжат АҚШ Конгресс Вакиллар палатаси томонидан маъқулланган.
Қонун Россия ҳукумати аъзолари, давлат компаниялари ва олигархларга нисбатан шахсий санкцияларни жорий қилади, Эронга қарши санкциялар режимини кенгайтиради ҳамда Россия нефти ва газини энг катта ҳажмда импорт қиладиган давлатларга нисбатан бож тарифларини назарда тутади.
Муҳожирлар кетмоқда — Москва эса қайтишга чақирмоқда
Бошланғич синф қизлари учун ҳижобни тақишни тақиқлаш таклиф қилинмоқда
"Мен ҳеч қачон 102-ҳарбий базани Арманистондан олиб чиқиш масаласини кўтармаганман"
