«Ан-Наср» сотувга қўйилиши мумкин: Роналду ҳам улуш олади

Криштиану Роналду Саудия Арабистонининг «Ан-Наср» клубида нафақат футболчи, балки акциядор мақомига ҳам эга бўлиши мумкин. Португалиялик юлдуз жамоа акцияларининг 20 фоизини қўлга киритиши эҳтимоли муҳокама қилинмоқда.

Semafor нашрининг хабар беришича, «Милан» клубига эгалик қилувчи RedBird Capital Partners компанияси ҳамкорлари билан биргаликда «Ан-Наср»нинг 70 фоиз улушини сотиб олиш имкониятини ўрганмоқда. Инвесторлар бунинг учун тахминан 267 миллион доллар тўлашга тайёр бўлиши мумкин.

Маълумотларга кўра, томонлар ўртасида камида иккита учрашув ўтказилган. Бироқ музокаралар ҳали дастлабки босқичда бўлиб, келишувга эришилиши кафолатланмаган.

Айни пайтда Саудия Арабистони Давлат инвестиция жамғармаси (PIF) клубнинг қарийб 213 миллион долларлик қарзини бартараф этиш устида ишламоқда. Бунинг учун жамғарма портфелидаги компаниялар билан ҳомийлик шартномаларини тузиш режалаштирилган.

Эҳтимолий битимда Saudi Media Company ҳам иштирок этиши мумкин. Шунга қарамай, клубнинг келажакдаги мулкчилик тузилмаси ҳозирча аниқ эмас.

Эслатиб ўтамиз, «Ан-Наср» Саудия Арабистони чемпионатида саккиз турдан кейин олтита ғалаба билан учинчи ўринда бормоқда.