Албанияда Трампнинг куёвига алоқадор компания муҳофаза остидаги ҳудудда курорт қуришига қарши намойиш бўлиб ўтди

Reuters агентлигининг хабар беришича, минглаб албанияликлар пойтахт Тирана кўчаларига чиқиб намойиш ўтказди. Улар АҚШ президенти Доналд Трампнинг куёви Жаред Кушнерга алоқадор компания томонидан Адриатика денгизи соҳилида режалаштирилган қурилиш лойиҳасига қарши норозилик билдирмоқда.

Reuters'нинг ёзишича, қиймати 1,6 миллиард доллар бўлган курорт лойиҳаси Кушнернинг Affinity Partners инвестисия фирмаси томонидан Вёсе-Нарта қўриқланадиган ҳудуди яқинидаги ўзлаштирилмаган соҳилда амалга оширилмоқда.

2024 йил декабр ойида Албания ҳукумати Кушнер томонидан таклиф этилган, бир вақтлар сувости кемаларининг махфий ҳарбий базаси бўлган кимсасиз Сазан оролида қурилиш қилиш режасига дастлабки рухсатни берганди.

Намойишчилар Албания бош вазири Эди Раманинг идораси олдига тўпланишди. Улар қўлларида “Миллат сотилмайди” ва “Мен Албаниянинг Дубай каби бўлишини хоҳламайман” деган ёзувли плакатларни ушлаб туришганди.

The New York Times'нинг ёзишича, агар режалар амалга ошса, ҳудудда 6 минг хоналик меҳмонхона ва виллалар қурилади. Албаниялик экологлар ҳудудга шунга ўхшаш бошқа лойиҳалар ҳам эргашиб келишидан хавотирда. Шу боис ушбу режага қарши чиқишмоқда. Уларнинг сўзларига кўра, бу қурилишлар бир неча юз гектарлик инсон қўли етмаган пляжларга салбий таъсир кўрсатади.

Албания бош вазири Эди Рама бу лойиҳаларни "туризм иқтисодиётини кенгайтириш ва хорижий инвесторларни жалб қилиш имконияти", деб ҳимоя қилмоқда.

Албания мухолифати эса "Эди Рама Трампнинг марҳаматига сазовор бўлиш учун унинг куёвига алоқадор компанияга имтиёзли муносабатда бўлмоқда", деган фикрда.