Албанияда талабалар намойиши кучайди: вазирлик биноларига ўт қўйилди

Албания пойтахти Тиранада ҳукуматга қарши намойишлар кучайиб, талабалар ва полиция ўртасида кетма-кет иккинчи кун тўқнашувлар юз берди. Намойишчилар Таълим вазирлиги биносига ўт қўйди, Молия вазирлигига эса ҳужум қилди.

«Тасним» агентлиги хабар беришича, чоршанба куни юзлаб киши бош вазир Эди Раманинг идораси ва икки вазирлик биноси томон юриш қилган. Асосан талабалардан иборат намойишчилар бош вазирнинг истеъфосини талаб қилган.

Айрим намойишчилар тўсиқлар ўрнатиб, полицияга тошлар ва Молотов коктейлларини отган. Полиция уларга қарши кўздан ёш оқизувчи газ ва сув тўпларидан фойдаланган.

Хабарларга кўра, икки намойишчи Таълим вазирлиги деворидан ошиб ўтиб, бинога ўт қўйган. Оқибатда бинодан қуюқ қора тутун кўтарилган, бироқ ўт ўчирувчилар ёнғинни тезда бартараф этган. Намойишчилар Молия вазирлиги эшикларини синдириб, бино ичига ҳам кирган. Кейинчалик бош вазир идоралари томон йўл олган айрим иштирокчилар бинога тош отган. Банк филиалида ҳам деразалар синдирилиб, ҳужжатлар ёқиб юборилган.

Намойишлар сешанба куни ҳам давом этган. Ўшанда иштирокчилар Тирана шаҳар ҳокимияти биносига ҳужум қилиб, уни ёқиб юборган ва бошқа биноларга зарар етказган. Полиция маълумотига кўра, ўнга яқин киши ҳибсга олинган.

Албанияда ҳукуматга қарши норозиликлар май ойи охиридан бери давом этмоқда. Уларнинг сабабларидан бири — муҳофаза қилинадиган соҳил ҳудудида ҳашаматли меҳмонхона қуриш режаси. АҚШ президенти Дональд Трампнинг қизи Иванка Трамп ва унинг турмуш ўртоғи Жаред Кушнер билан боғлиқ лойиҳа коррупция ҳамда шаффофлик етишмаслиги ҳақидаги эътирозларга сабаб бўлган.

Талабалар эса ўқиш тўловлари юқорилиги ва университетлардаги шароитлар ёмонлигидан ҳам норози.

Тиранадаги Европа Иттифоқи делегацияси зўравонликнинг кучайишидан хавотир билдириб, барча томонларни вазминликка чақирган. Шунингдек, намойишчилар ва журналистларга нисбатан полиция куч ишлатгани ҳақидаги хабарларни зудлик билан текшириш зарурлигини таъкидлаган.

Албания Европа Иттифоқига аъзо бўлишга номзод давлат ҳисобланади. Мамлакат 2030 йилгача иттифоққа қўшилишни мақсад қилган. Бироқ кучайиб бораётган ички норозиликлар мамлакатдаги сиёсий вазият ва Европа интеграцияси жараёнига нисбатан эътиборни оширмоқда.