Алания 27–28 март кунлари халқаро Ультра Траил пойгасига мезбонлик қилади

Туркия бугунги кунда кўплаб спорт турларида йирик халқаро мусобақалар мунтазам ўтказиладиган муҳим спорт марказларидан бирига айланиб бормоқда. Ана шундай спорт тадбирлари тез-тез ўтказиладиган масканлардан бири — Анталия шаҳри бўлиб, у мусаффо соҳиллари, мўътадил иқлими, бой маданий мероси ҳамда сув ва тоғ спортлари учун яратилган кенг имкониятлари билан ҳар йили миллионлаб сайёҳларни ўзига жалб этади.

Шаҳарнинг яширин дурдонаси ҳисобланган Алания 27–28 март кунлари яна бир бор Алания Ультра Траил пойгасига мезбонлик қилади. Ушбу мусобақа илиқ Ўрта ер денгизи билан Торос тоғларининг салқин ёнбағирлари орасидаги бетакрор ва ҳайратомуз йўналишларда ўтказилади.

Алания Ультра Траил 2017 йилда илк бор ташкил этилганидан буён 34 мамлакатдан 700 дан ортиқ спортчини бирлаштирган ва халқаро миқёсда эътироф этилган тоғ-сўқмоқ югуриш мусобақасидир. Бу йилги мусобақа “Анъанадан сўқмоққача” шиори остида ўтказилмоқда. Тадбир Туркия туризмни тарғиб қилиш ва ривожлантириш агентлиги (TGA) ҳамда Ёшлар ва спорт вазирлиги томонидан қўллаб-қувватланади.

Анъанадан сўқмоққача

Алания Ультра Траил қадимда эркин ва матонатли кўчманчи турклар — ёруклар (Йöрüклар) фойдаланиб келган кўч йўллари бўйлаб ўтказилади. Ушбу йўналишлар Торос тоғларидан Клеопатра соҳилига қадар чўзилиб, тарихий карвон йўллари, асрлар давомида сақланиб келаётган Алания кемасозлик устахонаси, Алания қалъаси, баланд тоғ манзаралари ва табиий гўзалликлар орқали ўтади.

Мусобақа бир нечта масофаларни ўз ичига олади. Энг узуни— 68 километрли Алания Ультра Траил (АУТ) йўналишидир. Бундан ташқари, 42 километрли Торос тоғлари йўли (ТМТ), 27 километрли Кейкубод тоғ югуриши (КМР), 18 километрли Клеопатра қисқа сўқмоғи (CСТ) ҳамда 5 километрли Алания қалъа югуриши (АCР) босқичлари ҳам мавжуд.

Мусобақа Дамлаташ ғори ва Клеопатра соҳилидан бошланади. Йўл давомида Топҳане, Қизил минора, Алания кемасозлик устахонаси (Терсане), Эсат буржи, Бедестен ҳамда Алания қалъаси каби тарихий масканлар орқали ўтилади. Шаҳар кўчаларидаги қисқа югуришдан сўнг саргузашт Торос тоғлари бағрига кўчади ва йўналиш яна Клеопатра соҳилидаги марра чизиғида якунланади.

Анталиянинг яширин дурдонаси: Алания

Анталиянинг шарқий қисмида жойлашган Алания такрорланмас табиат гўзаллиги, бир неча минг йиллик тарихга эга қалъалари ҳамда жўшқин ҳаёт тарзи билан сайёҳларни ўзига ром қиладиган жонли соҳил шаҳри ҳисобланади.

Алания ХIII асрда Салжуқийлар томонидан деворлар билан ўралган шаҳар сифатида барпо этилган. У қояли тепалик устида қурилган ва бугунги кунда ҳам аъло даражада сақланиб қолган Алания қалъаси билан машҳур. Қалъадан денгиз томон тушадиган эгри-бугри кўчалар ям-яшил боғлар орасида қад ростлаган анъанавий уйлар билан ўралган. Шаҳарнинг муҳим рамзлари қаторига тарихий Алания кемасозлик устахонаси (Терсане) ҳамда дастлаб мудофаа мақсадида бунёд этилган, бугунги кунда эса этнография музейи сифатида фаолият юритаётган саккиз қиррали Қизил минора (Кıзıл Куле) киради.

Бундан ташқари, Алания ўзининг ўхшаши йўқ табиий гўзалликлари билан ҳам ажралиб туради. Бу ерда Инжеқум ва Клеопатра соҳили каби Мовий байроқ мукофотига сазовор бўлган соҳиллар, шунингдек Сападере дараси, Дим ва Дамлаташ ғори, Дерекўй яйласи каби мафтункор табиий масканлар мавжуд.

Алания ўзининг ранг-баранг гастрономик маданияти билан ҳам эътиборни тортади. Бу ерда кўча таомлари — масалан, гўзлемедан тортиб, нафис Ўрта ер денгизи таомларигача бўлган хилма-хил лаззатларни татиб кўриш мумкин. Янги тутилган денгиз маҳсулотлари, жумладан балиқ ва саккизоёқ, турли газаклар ҳамда чўпон қовурмаси каби анъанавий таомлар ҳудуднинг ўзига хос гастрономик бойлигини намоён этади.

Шунингдек, Аланиянинг жўшқин тунги ҳаёти ҳам алоҳида эътиборга лойиқ. Жонли барлар ва мусиқа масканлари туфайли қуёш ботганидан кейин ҳам шаҳар ҳаёти давом этади ваа унинг бетакрор энергияси тун бўйи сақланиб қолади.