Central Asian University — собиқ Akfa University 10-11-синф ўқувчиларининг универистетга қабул қилиниши билан боғлиқ хабарларга муносабат билдирди.
Таъкидланишича, бундан икки йил аввал Акфа университетининг собиқ ректори томонидан «Study for the success» МЧЖни Университет таъсисчисидан яширин ҳолда, фирибгарлик йўли билан ўзига қўшимча маблағ ишлаш мақсадида жалб қилган, амалдаги қонунларга хилоф йўл билан ушбу МЧЖ номидан ота-оналар билан шартномалар тузган.
Шартномага мувофиқ ота-оналарга уларнинг фарзандлари мактабнинг 10-11 синфларида ўқиш билан бир вақтнинг ўзида Акфа университетининг 1-босқичини ўқиб тугатиши ва мактабни битириши биланоқ Университетнинг 2-босқичига қабул қилиниши МЧЖ томонидан ваъда қилинган ва ота-оналар ушбу хизмат эвазига МЧЖ ҳисоб рақамига муайян тўловларни қилишган.
Шунингдек, МЧЖнинг ҳисоб рақамига тушган пул маблағлари Б.Джалиловнинг турмуш ортоғига тегишли бўлган МЧЖ томонидан ўзлаштириб юборилган.
💬 «Бироқ, ушбу МЧЖнинг Акфа университетига ҳеч қандай алоқаси йўқ. Ўқувчиларни мактабда ўқиб турган вақтида университет дастурларига қабул қилиш ҳам қонунчиликка зид. МЧЖ таъсис ҳужжатидан кўриниб турибдики, у собиқ ректорнинг яқин қариндоши томонидан таъсис этилган, контакт маълумотлари ҳам унга тегишли, ўзини банкларнинг бирида алоҳида ҳисоб рақамлари мавжуд,» – дейилади университет баёнотида.
Ушбу иш юзасидан хуқуқни муҳофаза қилувчи органлар, хусусан туман прокуратураси томонидан жиноий иш қўзғатилган бўлиб, жабрланувчилар туман прокуратурасига тегишли шикоят билан мурожаат қилишлари мумкинлиги маълум қилинди.
Университет ўз ўрнида, Б. Джалиловнинг қонунга хилоф ҳатти-ҳаракатларидан жабрланган ва қўлида шаҳодатномалари (11 синф) бор болаларни тез кунларда, ўрнатилган тартибда Университетнинг 1-босқичига қўшимча қабул қилишини ота-оналарга маълум қилди.
