Afrosiyob поезди эмас, манёвр тепловози ёнди — Ўзбекистон темир йўллари

Чоршанба куни кечқурун ижтимоий тармоқларда Afrosiyob тезюрар поездида ёнғин чиққани акс этган видео пайдо бўлди.

«Ўзбекистон темир йўллари»нинг маълум қилишича, «ёнғин фақат поездни ташиш бўйича ёрдамчи ишларни бажарувчи манёвр локомотивига таъсир қилган».

«Afrosiyob поезди ёнғинга учрамаган ва эртага жўнаб кетади. Ёнаётган тепловоз ичида йўловчилар борлиги ҳақидаги даъволар нотўғри. Ҳодиса рейсдан ташқарида содир бўлган ва ўша пайтда поезд йўловчиларни ташимаган», — дейилади компания хабарида.

Воқеа жойига етиб келган мутахассислар томонидан ёнғин ўчирилди. Компания ёнғин ҳақида кейинроқ маълумот беришга ваъда берди.

Afrosiyob тезюрар электр поездининг барча йўналишлари жадвалда ўзгаришларсиз қатнайди, деб хабар қилди «Ўзбекистон темир йўллари».