Африка маймунчечак туфайли фавқулодда ҳолат эълон қилди

13 август, сешанба куни Африканинг олий соғлиқни сақлаш идораси Конго Демократик Республикасидан қўшни мамлакатларга тарқалган чечак эпидемияси туфайли "қитъа хавфсизлигига таҳдид солувчи жамоат саломатлиги фавқулодда ҳолати"ни эълон қилди. Бу ҳақда Reuters хабар бермоқда.

Чечак яқин алоқа орқали юқади ва гриппга ўхшаш аломатлар ва йирингли тери лезёнларини келтириб чиқаради. Кўпгина ҳолларда касаллик енгил, аммо ўлимга олиб келиши мумкин.

"Конгодаги эпидемия Clade I деб номланувчи эндемик штаммнинг тарқалиши билан бошланди. Аммо Clade Ib деб номланувчи янги штамм мунтазам яқин алоқалар орқали, айниқса болалар орасида осонроқ тарқалади", дейилади баёнотда.

Африка Касалликларни назорат қилиш ва олдини олиш маркази (Africa CDC) ўтган ҳафтада вирусли инфекциянинг тарқалиш тезлиги хавотирли эканлигини айтди. Шунингдек, жорий йилда қитъада чечак билан касалланган 15 мингдан ортиқ ҳолат ва 461 киши вафот этгани, бу 2023 йилнинг шу даврига нисбатан 160 фоизга ошгани маълум қилинди.