Ўтган йили Афғонистонда 15 мингга яқин одам гепатит B ва C вируси билан касалланган. Бу ҳақда якшанба куни мамлакат соғлиқни сақлаш вазирлиги маълум қилди, дея хабар беради Xinhua.
Соғлиқни сақлаш вазири ўринбосари Мавлавий Абдулвали Ҳаққоний Бутунжаҳон гепатитга қарши кураш куни муносабати билан ўтказилган маросимда маълум қилишича, сўнгги бир йил ичида 15 мингга яқин одам гепатит вируси билан касалланган, жумладан, 12 минг нафари В гепатити ва 1300 га яқини С гепатити билан касалланган.
- Охирги ўн йил ичида Афғонистонда 100 000 дан ортиқ одам гепатит билан касалланган бўлиши прогноз қилинмоқда, жумладан 70 000 гепатит В ва 30 000 гепатит C билан, - дея Ҳаққоний Афғонистонда гепатит билан касалланганлар сони камайиб бораётганини қўшимча қилди.
Унинг сўзларига кўра, Афғонистонда гепатит вирусининг тарқалишига аҳолининг кўчиши, миграция, қашшоқлик, гиёҳванд моддаларни истеъмол қилиш, ўз-ўзини даволаш, текширувсиз қон топшириш ва гигиена қоидаларига риоя қилмаслик сабаб бўлган.
Афғонистоннинг 34 провинциясидан 12 тасида гепатит диагностикаси ва даволаш марказлари фаолият кўрсатмоқда, яна 8 та провинцияда вирус юқтирган одамларга тиббий хизматлар кўрсатилмоқда.
