26-Халқаро «Қурилиш – UzBuild 2025» кўргазмаси бошланди

Тошкентдаги «Ўзэкспомарказ» ва Central Asian Expo (CAEx Uzbekistan) кўргазма мажмуаларида "Қурилиш – UzBuild 2025" 26-Халқаро кўргазмаси ўз экспозициясини намойиш этишни бошланди. Тадбир Iteca Exhibitions халқаро кўргазма компанияси томонидан ташкил этилмоқда.

Жорий йилги UzBuild 2025 кўргазмасида 20 мамлакатдан 400 га яқин компания ва брендлар иштирок этмоқда. Буюк Британия, Германия, Туркия миллий павилонлари тақдим этилади, Россия Федерациясининг бир қатор ҳудудлари ва Испания компаниялари жамоавий тарзда иштирок этмоқда. Озарбайжон, Беларус Республикаси, Афғонистон, Хитой, БАА нуфузли делегацияларининг ташриф буюрган.

CАEх да кўргазманинг асосий экспозицияси – қурилиш ускуналари, асбоблар, қурилиш материаллари, кимё ва электр маҳсулотлар намойиш этилмоқда.

«Ўзэкспомарказ»да UzBuild'нинг интерьер қисми ҳамда мебелсозлик ва ёғочсозлик кўргазмаси жойлашган.

Кўргазманинг ихтисослаштирилган бўлими «Қурилиш техникаси ва технологиялари – Build Tech» - қурилиш техникаси, йўл қурилиши ускуналари, қурилиш материаллари ишлаб чиқариш ва кўплаб бошқа маҳсулотларнинг кенг танлови хам CАEх мажмуасининг очиқ майдонида намойиш этилаяпти.

Шунингдек, кўргазма доирасида 6-Халқаро қурилиш саноати анжумани – ISSI 2025 ўз ишини бошлади. Анжуманнинг бу йилги мавзуси – “Янги Ўзбекистоннинг қурилиш салоҳияти”. Анжуманда етакчи компаниялар, молия институтлари вакиллари ва йирик халқаро экспертлар иштирок этмоқда. Тадбир нафақат хорижий тажриба билан танишиш, балки қурилиш соҳасидаги маҳаллий лойиҳаларни потенциал инвесторлар ва ҳамкорлар эътиборига етказиш учун самарали имкониятдир.

Халқаро анжуман доирасида кўргазма ва унинг фаолияти ҳақида тўлиқ маълумотларни етказиш, шунингдек кўргазма экспозицияси билан таништириш мақсадида ОАВ вакиллари учун пресс-турлар ҳам ташкил этилди.

Эътиборлиси, бу йилги кўргазмада 100 дан ортиқ маҳаллий ишлаб чиқарувчилар иштирок этмоқда. Жумладан, “ARTON”, “Knauf”, “Ytong” “Imperial”, “VERO”, “EKOKERAMA”, “AWP”, “MaxDecor”, “Akfa”, “Thermo Plus” каби жаҳон бозорида ўз ўрнига эга миллий брендлар қатнашмоқда.

Маълумот учун, Халқаро қурилиш кўргазмаси UzBuild 2000 йилда ташкил этилган. Кўргазма бошиданоқ асбоб-ускуналар, технологиялар ва қурилиш материалларнинг энг янги намуналари билан танишиш учун ноёб бизнес майдон сифатида қурилиш саноатининг етакчи компанияларининг эътиборини ўзига тортди. Қайд этиш керакки, қисқа вақт ичида UzBuild Ўзбекистонда қурилиш саноатининг асосий тадбирига айланди. Шу вақт ичида кўргазмада 45 мамлакатдан 3 953 та компания иштирок этди. UzBuild туфайли Ўзбекистонга қурилиш саноати бўйича кўплаб инвестициялар ва технологиялар жалб қилинди, маҳаллий экспортчилар янги бозорлар ва хорижий ҳамкорларни топдилар. Тадбир ўз қамрови бўйича нафақат Ўзбекистонда, балки бутун Марказий Осиё минтақасида ягона саналади.

«Қурилиш – UzBuild 2025» кўргазмаси Ўзбекистон қурилиш саноатининг етакчи вакилларини жамлайдиган қурилиш соҳасидаги энг йирик кўргазма тадбиридир.

Эслатиб утамиз, УзБуилд кўргазмаси ва анжуманга ташриф буюриш учун www.uzbuild.uz сайтида онлайн регистрациядан ўтиш керак.

Халқаро кўргазма 27 февралга қадар давом этади.