Украинанинг турли ҳудудларига Россия томонидан ракета ҳужумлари уюштирилмоқда

Украинанинг бир қанча минтақаларида ҳаво ҳужуми ҳақида огоҳлантириш эълон қилинган. Ракета зарбалари ҳақида огоҳлантиришлар Украина Ҳарбий-ҳаво кучлари томонидан берилган.

Ҳаво ҳужумидан мудофаа тизимлари Днепропетровск, Хмелницкий, Кировоград, Лвов вилоятларидан ишлаётгани хабар қилинган. Хусусан, Украина ҳаво ҳужумидан мудофаа кучлари Россиянинг иккита “Кинжал” ракетасини уриб туширгани хабар қилинган.

Винница, Николаев ва Одесса вилоятлари ҳам қанотли ракеталар билан ўққа тутилгани ҳақида маълум қилинган.

Украина ҳарбий-ҳаво кучлари Киев, Житомир, Хмелницкий, Лвов ва Кировоград вилоятлари аҳолисидан махсус бошпаналарда қолишни сўрамоқда.

Киевда ҳаво ҳужуми сабабли метро ҳаракати тўхтатилган ва стансиялар аҳоли учун бошпана режимида ишлай бошҳлаган.

Ҳозирча ракета зарбалари оқибатида қурбон бўлганлар ва вайроналар ҳақида маълумот берилмаган.

Зарбалар ҳақидаги хабарларнинг асосий қисми Хмелницкий вилояти Староконстантинов шаҳри ҳудудидан келмоқда.

Айнан шу ерда Украина Ҳарбий-ҳаво кучларининг Су-24М фронт бомбардимончилари жойлаштирилган, улар Британиянинг "Storm Shadow" қанотли ракеталарини ташувчи сифатида ишлатилади.

Шу билан бирга, маҳаллий журналистлардан Киев ва Полтава вилоятларида кучли портлашлар содир бўлгани ҳақида хабарлар келмоқда.

Россия авиацияси Украина Қуролли кучларининг Кировоград ва Днепропетровск вилоятларидаги обектларига ҳам ҳужум қилмоқда.