Хоразм вилояти Гурлан туман тиббиёт бирлашмасига 2017 йил 26 ноябрда ҳомиладор аёлга нотўғри тиббий муолажалар қилинганлиги ва ўз вақтида тўғри тиббий ёрдам кўрсатилмаганлиги оқибатида 2017 йил 6 декабрь куни вафот этганлиги бўйича тиббий муассаса ходимлари Г.Каримова, А.Хайитбаев ва Н.Қўчқаровага нисбатан ЖКнинг тегишли моддалари билан жиноят иши қўзғатилган. Жиноят ишлари бўйича Гурлан туман суди томонидан Г.Каримова ЖКнинг тегишли моддалари билан айбли деб топилиб, унга 3 йил муайян ҳуқуқдан маҳрум қилиш, 4 йил-у 6 ой озодликни чеклаш ва энг кам ойлик иш ҳақининг 70 баравари миқдорида жарима, Н.Қўчқаровага эса 1 йил муайян ҳуқуқдан маҳрум қилиш, 2 йил-у 1 ой озодликни чеклаш жазолари қўлланилган бўлса, А.Хайитбаевга 2 йил муайян ҳуқуқдан маҳрум қилиш, 3 йил-у 6 ой озодликни чеклаш жазолари тайинланди.
Шунингдек, Гурлан тумани, Вазир қишлоғи, Деҳқонобод маҳалласида яшаган А.Машарипованинг чақалоғи туғруқдан кейинги асоратлар билан вафот этганлиги бўйича жиноят иши қўзғатилиб, муассаса шифокори М.Бобожанова ЖКнинг 116-моддаси 4-қисми билан жиноий жавобгарликка тортилган.
Шунингдек, вилоят патологоанатомик экспертиза бюроси томонидан мурдаларни ёрмасдан туриб, ўлим сабаблари ҳақида хулосалар бериб келинганлиги юзасидан вилоят прокуратураси томонидан бюро мансабдор шахсларига нисбатан ЖК 209-моддаси 1-қисми билан жиноят иши қўзғатилиб, қонуний қарор қабул қилинган ва ушбу нотўғри амалиётга чек қўйилган.
Дарҳақиқат, бирламчи тиббий-санитария муассасаларида тиббий хизмат сифатини яхшилаш, профилактик чора-тадбирларни кучайтириш орқалигина оналик ва болаликни муҳофаза қилиш, оналар ва болалар ўлими кўрсаткичларини камайтириш мумкин.
Хоразм вилояти прокурорининг катта ёрдамчиси Гулшаной Ўразбаеванинг маълум қилишича, бу жараён прокуратура органларининг доимий назоратида бўлади.
Эслатма: Маълумотлар «Ҳуқуқ» нашридан олинди.
Ўзбекистон тиббиёти оғир жудоликка учради
Сирдарёда аёл ва унинг фарзандларини ўлдириб, уйни ёқиб юборишди
Шавкат Мирзиёевни ҳақоратлаб, изоҳ ёзган йигит 5 йилга қамалди
