Yaponiyaning yangi bosh vaziri Tramp bilan uchrashish orqali o‘zining eng katta sinoviga duch kelmoqda

Yaponiyaning yangi bosh vaziri Sanae Takaichi uchun ilk katta xalqaro sinov — AQSh prezidenti Donald Tramp bilan uchrashuv bo‘ladi. Bu uchrashuv uning diplomatik tajribasini va siyosiy nufuzini sinovdan o‘tkazadi.

Takaichi seshanba kuni Imperator Naruxito bilan Imperator saroyida bo‘lib o‘tadigan inaugurasiya marosimida qatnashish uchun bosh vazirlik idorasini tark etdi. Uning rahbar sifatidagi faoliyati shu kundan rasman boshlandi.

Yaponiya rahbari bo‘lishidan bir necha oy avval Takaichi Tramp bilan uchrashishga taklif qilingan, ammo o‘sha paytdagi bosh vazir Sigeru Ishiba AQShning yangi prezidenti bilan ilk bo‘lib uchrashishi lozimligini bildirgani sababli, u bu taklifni rad etgan edi.
«Bir kun kelib, u bilan munosib darajada uchrashish imkoniga ega bo‘lish uchun qattiq mehnat qilishni maqsad qilganman», — deb yozgan edi Takaichi o‘zining ijtimoiy tarmoqdagi sahifasida.

Endilikda o‘sha kun keldi. Takaichining global sahnadagi ilk yirik chiqishi Malayziyadagi ASEAN sammiti va Janubiy Koreyadagi APEC yig‘ilishi bilan bog‘liq bo‘ladi. Eng muhim voqea esa Trampning Tokio tashrifi chog‘ida Takaichi bilan ilk uchrashuvi bo‘ladi.

Air Force One bortida Tramp jurnalistlarga Takaichi haqida yuqori fikr bildirdi:
«U juda yaxshi, go‘zal va samimiy ayol», — dedi AQSh prezidenti. Ular shanba kuni telefon orqali suhbat qurgan va Tramp bu suhbatni «juda yaxshi» deb baholagan.

Yaponiyaning yangi bosh vaziri uchun bu uchrashuvning ahamiyati katta. AQSH-Yaponiya ittifoqi dunyodagi eng kuchli hamkorliklardan biri sanaladi, ammo Takaichining cheklangan diplomatik tajribasi va Trampning kutilmagan siyosiy yondashuvi muzokaralarni jiddiy sinovga aylantirishi mumkin.

Uchrashuvda tariflar, mintaqaviy xavfsizlik va Yaponiyaning mudofaa xarajatlari kabi masalalar muhokama qilinishi kutilmoqda. Yaponiyaning hukmron Liberal-demokratik partiyasi ichida ba’zilar AQShning Hind-Tinch okeani mintaqasiga bo‘lgan e’tibori susayib borayotganidan xavotirda.

Ichki siyosiy maydonda esa Takaichi korrupsiya mojarolaridan keyin partiyaning nufuzini tiklash vazifasiga duch kelmoqda. Uning maќullash reytingi hozirda 71 foizni tashkil etadi va bu ko‘rsatkichni saqlab qolish hukumat jamoasi uchun muhim hisoblanadi.