Xitoy – Qirg‘iziston – O‘zbekiston temir yo‘li qurilishi boshlandi

27 dekabr sanasi tarixiy kun sifatida mintaqamiz tarixida muxrlanadigan bo‘ldi.

Qirg‘izistonning Jalolobod viloyatida Xitoy – Qirg‘iziston – O‘zbekiston temir yo‘li qurilishiga start berildi. Shu munosabat bilan bo‘lib o‘tgan marosimda Qirg‘iz Respublikasi Prezidenti Sadir Japarov, O‘zbekiston Bosh vaziri o‘rinbosari Jamshid Xo‘jayev, Xitoyning Taraqqiyot va islohotlar qo‘mitasi raisi Chjen Shansze rahbarligidagi delegasiyalar ishtirok etdi.

Marosim avvalida O‘zbekiston Prezidenti Shavkat Mirziyoyev hamda XXR Raisi Si Szinpin tadbir ishtirokchilariga murojaat yo‘lladi.

Davlatimiz rahbari murojaatida aytilishicha, ushbu yo‘l orqali yiliga 15 million tonna yuk tashiladi.

Kelgusida ushbu temir iz Transafg‘on yo‘lagi bilan tutashib, Xitoy, Markaziy Osiyo va Janubiy Osiyo o‘rtasidagi transport-kommunikasiya tarmog‘ini samarali birlashtirish va kuchaytirishga imkon yaratadi.

Qoshg‘ar – Torugart – Makmal – Jalolobod – Andijon yo‘nalishi bo‘yicha 20 bekat, 42 ko‘prik, 25 tonnel barpo etiladi. Bundan tashqari zamonaviy tranzit-logistika infratuzilmasi, omborxona va terminallar quriladi.

Mazkur yirik loyiha amalga oshirilishi shubhasiz, mamlakatlarimiz iqtisodiyotiga katta foyda keltiradi. Pirvardida yuzlab yangi korxonalar, o‘n minglab ish o‘rinlari yaratiladi.