Koronavirusga qarshi kurashish shtabi vakili, Toshkent shifokorlar malakasini oshirish instituti rektori, professor Xabibulla Oqilov «O‘zbekiston 24» telekanaliga bergan intervyusida aholini karantin choralariga jiddiy rioya qilishga chaqirdi:
«Bugungi kunda bizda vafot etganlarning 13 foizi 40 yoshgacha bo‘lgan insonlar. Afsuski, vafot etganlar orasida 14 yoshli bola (20 yoshgacha bo‘lganlar — 3 foiz) ham bor, — dedi Xabibulla Oqilov. — Odamlar buni juda jiddiy qabul qilishlari kerak va ulardan deyarli hech narsa talab qilinmaydi: asosan oddiy gigiyena qoidalariga, o‘z-o‘zini saqlashning birlamchi qoidalariga rioya qilish».
«Afsuski, hamma ham tushunmayapti, — davom etdi Oqilov. — Bizda ochiqchasiga: „Umuman olganda, koronavirus degan narsa bormi? Masalan, ko‘rmaganman. Mening na bir do‘stim, na bir qarindoshim kasal bo‘lmagan. Men har kuni ko‘chada bo‘laman va menda hech narsa yo‘q“ deydigan odamlar bor».
Professor aholi niqobni iyaklariga tushurib yurayotganini yoki umuman taqmayotganini, ko‘chalarda guruh bo‘lib yig‘ilayotganini ta’kidladi:
«Odamlar ba’zi oilaviy bayramlar, to‘ylarni nishonlashda davom etishmoqda, agar dafn marosimi bo‘lsa, odamlar marhumning qarindoshlari bilan uchrashishni, ta’ziya izhor qilish uchun u yerga jamoa bo‘lib yig‘ilib borishni shart deb hisoblashadi. Biz barchaga o‘zini himoya qilish instinkti — bugungi kunda eng muhim masala bo‘lishi kerakligini tushuntirayapmiz, biz o‘zimizni, ota-onamiz, bolalarimiz va nabiralarimiz haqida o‘ylashimiz kerak», — deya ta’kidladi u.
«Biz shifokorlarning vazifasi — vaziyatning jiddiyligini tushuntirishdir: koronavirus mavjud, uni juda jiddiy qabul qilish kerak, chunki biz rivojlangan mamlakatlarda vaziyatning jiddiyligini anglamaslik nimalarga olib kelayotganini ko‘rayapmiz», — dedi Xabibulla Oqilov.
Moskva Isroilning ehtimoliy hujumidan himoya qilish uchun Eronga zamonaviy qiruvchi va havo mudofaa tizimlarini topshirishi mumkin
Tojikiston chegarachilari yetti nafar afg‘onni otib o‘ldirdi
Qirg‘iziston Moskvaning bayonotlaridan norozi
