“Uyda yolg‘iz” filmidagi uy sotib yuborildi

Qariyb 850 metr kvadrat maydonga ega ikki qavatli g‘ishtin uy joriy yil may oyida 5,25 million dollarga baholangan.

Chikago chekkasidagi Vinnetka qishlog‘ida joylashgan “Uyda yolg‘iz” filmida bosh qahramon Kevin Makkallisterning oilasi yashagan ikki qavatli uy Yangi yil bayrami arafasida sotib yuborildi. Bu haqda “The Independent" nashri xabar berdi.

Qayd etilishicha, qariyb 850 metr kvadrat maydonga ega ikki qavatli g‘ishtin uy joriy yil may oyida 5,25 million dollarga baholangan. Uy ro‘yxatga olingan Coldwell Banker Realty veb-saytida "sotish kutilmoqda" deb yozilgan, ya’ni sotuvchi mulk bo‘yicha taklifni qabul qilgan.

Makkallisterlar uyi 1990 yildagi film muvaffaqiyatidan keyin ikkinchi marta sotuvga qo‘yilgan. 2012 yilda uy 1,58 million dollarga sotilgan. Xaridor topilishiga bir yil vaqt ketgan.

Keyin yangi egalar uyni qayta ta’mirlagan. Bosh qahramon chanada tushgan ikkinchi qavatdagi asosiy zinapoya ham rekonstruksiya qilingan.

Ko‘chmas mulk ikkita mehmonxona, beshta yotoqxona va oltita yuvinish xonasidan iborat. Shuningdek, bu yerda katta qishki bog‘, kinozal va basketbol o‘ynash uchun sport maydonchasi ham mavjud.

Kevin obrazini gavdalantirgan Makoley Kalkin AQSh OAVlaridan biriga bergan intervyusida mazkur uyni shaxsan o‘zi sotib olmoqchi ekanligini aytgan, biroq keyinchalik aktyor bu fikridan qaytgan.