UNIDO 2025-yilgi EcoExpo ko‘rgazmasida O‘zbekistonda ekologik sanoat zonalarini targ‘ib qilish uchun Media-branch tashkil qildi

Birlashgan Millatlar Tashkilotining Sanoatni Rivojlantirish Tashkiloti (UNIDO) O‘zbekiston Respublikasi Iqtisodiyot va moliya vazirligi hamda Ekologiya, atrof-muhitni muhofaza qilish va iqlim o‘zgarishi vazirligi bilan hamkorlikda 2025-yil 20-iyun kuni EcoExpo Central Asia 2025 doirasida CAEx ko‘rgazma markazida Media-branch va matbuot anjumanini tashkil etdi.

Mazkur tadbir UNIDO tomonidan amalga oshirilayotgan "O‘zbekistonda ekologik sanoat zonalari (EIP)" loyihasi doirasida o‘tkazildi. Loyiha Germaniya Federal iqtisodiy hamkorlik va taraqqiyot vazirligi (BMZ) tomonidan moliyalashtiriladi va Germaniya xalqaro hamkorlik jamiyati (GIZ) tomonidan qo‘llab-quvvatlanadi.

Media-branch O‘zbekistonda barqaror sanoat rivojlanishini targ‘ib qiluvchi EIP loyihasining yutuqlari, natijalari va kelajakdagi rejalarini ommaga yetkazish va OAVni jalb qilishga qaratilgan. Loyiha Urgut erkin iqtisodiy zonasi va Farg‘onadagi Mexanika kichik sanoat zonasi kabi tanlab olingan hududlarda ekologik sanoat tamoyillarini amaliyotga joriy etish orqali barqaror sanoatni rivojlantirishni maqsad qilgan.

Tadbirda vazirliklar, sanoat zonalari ma’muriyatlari, xususiy sektor vakillari va xalqaro hamkorlar qatnashishi kutilmoqda. UNIDO, GIZ va O‘zbekiston hukumati vakillari ekologik zonalar orqali toza ishlab chiqarish, resurslardan samarali foydalanish va yashil iqtisodiy o‘sishni qanday amalga oshirish bo‘yicha o‘z qarashlarini taqdim etdilar.

Tadbir davomida jurnalistlar va OAV vakillariga matbuot materiallari taqdim etiladi, shuningdek, loyiha ishtirokchilari bilan bevosita muloqot qilish imkoniyati yaratiladi. Loyiha doirasida olingan natijalar, toza ishlab chiqarish va resurs samaradorligi (RECP) baholashlari, shuningdek, tanlab olingan zonalardagi sarmoya imkoniyatlari haqida ma’lumotlar taqdim etildi.
UNIDOning O‘zbekistonda ekologik sanoat zonalari bo‘yicha loyihasi mamlakatni inklyuziv va barqaror sanoat rivojlanishi sari yo‘naltirishga xizmat qiladi. Loyiha davlat siyosatiga ko‘mak beradi, salohiyatlarni mustahkamlaydi va tanlab olingan sanoat zonalarida ekologik, ijtimoiy va iqtisodiy samaradorlikni oshirish maqsadida barqaror amaliyotlarni targ‘ib qiladi.

EIP tashabbusi GIZ tomonidan Germaniya hukumati topshirig‘iga binoan amalga oshirilayotgan “O‘zbekistonda xususiy sektorni rivojlantirish va iqtisodiy siyosat bo‘yicha maslahatlar” loyihasining bir qismidir.