Ukrainaning «qotil robotlari»

Ukraina harbiylari jang maydonida «qotil robotlar» — turli to‘siqlar va elektron urush tizimlarini chetlab o‘tishga qodir hujumchi dronlardan tobora ko‘proq foydalana boshladi, deb yozadi The Wall Street Journal.

Kiyev uchun uchuvchisiz uchish apparatlarini yetkazib beruvchilar ularni ishlab chiqarishni sanoat miqyoslariga yetkazmoqda. Gap Amerikaning Auterion kompaniyasining Skynode tizimi bilan jihozlangan dronlar haqida ketmoqda. Skynode - bu musht o‘lchamidagi mini-kompyuter va parvoz kontrolleri. Prosessor Ukraina kompaniyalari tomonidan ishlab chiqarilgan dronlar ichiga joylashtiriladi.

Auterion saytida aytilishicha, "kompyuter ko‘rish" texnologiyalari GPS signal to‘sqinlovchilariga qarshi kurashish imkonini beradi. Tizimning boshqa afzalliklari orasida dronlar galasini boshqarish va to‘liq avtonom parvoz qilish imkoniyati ham mavjud. WSJ xabar berishicha, Kiyev o‘n minglab shunday kichik hajmli kompyuterlarni qo‘lga kiritadi.

Shunga o‘xshash tizimlarni boshqa kompaniyalar ham ishlab chiqmoqda, ularning ko‘pchiligi ukrainalik. Masalan, FPV-dronlar (First Person View, birinchi shaxs nuqtai nazaridan) ishlab chiqaradigan Vyriy drone startapi. Noyabr oyida u nishonni avtomatik ravishda aniqlash va uchuvchining aralashuvisiz portlovchi moddani nishonga yetkazish imkonini beruvchi qo‘shimcha yo‘naltirish tizimini joriy etgani haqida ma’lumot berdi. Dronlarga o‘rnatilgan kompyuterlarning narxi taxminan 15 dollarni tashkil etadi.