Ukraina prezidenti devoni rahbarligidan iste’foga chiqqan Yermak frontga bormoqchi

The New York Post Andrey Yermakning ishdan bo‘shagani haqidagi xabardan bir necha soat o‘tib kelgan xatini e’lon qildi.

"Meni haqorat qilishdi va mening qadr-qimmatim himoya qilinmadi, garchi men 2022 yil 24 fevraldan beri Kiyevda bo‘lsam ham. Men Zelenskiyga muammo tug‘dirishni xohlamayman, shuning uchun frontga ketaman. Menga qarshi to‘qilayotgan bo‘htonlar meni g‘azablantirdi, ammo haqiqatni biladiganlarning qo‘llab-quvvatlamasligi bundan ham ko‘proq g‘azabimni keltiradi", — deyiladi Yermakning maktubida.

Ermak qachon va qanday tarzda frontga jo‘nashi haqida aniq ma’lumot bermagan.

Kecha Ukrainaning korrupsiyaga qarshi kurash organlari Yermakning uyida tintuv o‘tkazgandi, biroq unga qarshi qandaydir ayb qo‘yilmagan. “Energoatom” davlat kompaniyasi bilan bog‘liq korrupsiya mojarosi boshlanganidan so‘ng ko‘pchilik — muxoliflar ham, Zelenskiyning safdoshlari ham prezidentni Yermakni ishdan bo‘shatishga chaqirgandi.