Ashxobod shahridagi «Barakali» bozori xaridorlar uchun yopib qo‘yilib, telereportaj tayyorlash maqsadida mahsulotlar bilan to‘ldirildi, deb xabar beradi «Xroniki Turkmenistana»ga asoslanib Daryo nashri.
Guvohlarning so‘zlariga ko‘ra, bozor rastalari turli-tuman meva va poliz ekinlari, qandolatchilik mahsulotlari, oxirgi vaqtlarda ancha taqchil bo‘lgan tovuq tuxumlari bilan to‘ldirilgan. Rastalar orasida operatorlar kamerasi bilan harakatlangan. Bozorga kirishda esa operatorlarning yordamchilari navbatchilik qilgan. Ular bugun bozor ishlamasligini aytib, xaridorlarni bozor ichiga qo‘ymagan.
Mustaqil jurnalistlarning taxminicha, «oziq-ovqat mo‘lligi» haqidagi reportaj Turkmaniston mustaqilligi kuni — 27 sentyabrda televideniye orqali namoyish etilishi mumkin.
«Umuman olganda deyarli har kuni davlat OAVlarida mamlakatda yetishtirilayotgan mahsulotlar haqida materiallar namoyish etilmoqda», — deyiladi xabarda.
Mustaqil OAVning ma’lumotlariga ko‘ra, Turkmaniston davlat do‘konlarida so‘nggi bir necha yildan buyon taqchillik va uzundan uzoq navbatlar kuzatilmoqda. Xususiy do‘konlarda tanlov bor, biroq narx ancha qimmat. Narxlarning yuqoriligi dollarning rasmiy va «qora bozor»dagi kursi orasidagi farq bilan izohlanmoqda.
Ukraina prezidenti Rossiya bilan muzokaralarga tayyor ekanini aytdi
Moskva Isroilning ehtimoliy hujumidan himoya qilish uchun Eronga zamonaviy qiruvchi va havo mudofaa tizimlarini topshirishi mumkin
Eron raketalarining aksariyati Isroilning Arrow mudofaa tizimi yordamida qo‘shni davlatlar ustida urib tushirilgan
