Turkiya Tashqi ishlar vaziri Hoqon Fidan AQSh va Eron o‘rtasida tinchlik kelishuviga erishilsa, Anqara Ho‘rmuz bo‘g‘ozida minalarni tozalash ishlarida qatnashishga tayyorligini bildirdi. Bu haqda u bugun, 25 aprel kuni Buyuk Britaniyaga amalga oshirgan rasmiy tashrifi davomida OAV vakillariga ma’lum qildi.
Oksford universitetida bo‘lib o‘tgan tadbirdan so‘ng jurnalistlar bilan suhbatlashgan vazir Turkiya mojarodan keyingi tiklanish jarayonlariga ijobiy qarashini ta’kidladi. Fidanning so‘zlariga ko‘ra, Anqara texnik va insonparvarlik xarakterdagi vazifalarni bajarishga qarshi emas.
«Aytaylik, Eron va AQSh o‘zaro kelishuvga erishdi va tinchlik o‘rnatildi. Bunday vaziyatda xalqaro koalisiya minalarni tozalash kabi texnik ishlarni amalga oshirishida hech qanday muammo yo‘q. Prezidentimiz tomonidan Milliy mudofaa vazirligiga bu bo‘yicha tegishli topshiriqlar berilgan», — dedi Turkiya TIV rahbari.
Hoqon Fidan Ho‘rmuz bo‘g‘ozidagi vaziyat bo‘yicha voqealar rivojining ikkita ehtimoliy yo‘nalishini ochiqladi:
Birinchi ssenariy: Muzokaralar muvaffaqiyatli yakunlanib, dengiz yo‘llari hech qanday cheklovlar va qo‘shimcha to‘lovlarsiz xalqaro yuk tashish uchun ochiq qoladi.
Ikkinchi ssenariy: Agar muzokaralar natija bermasa va urush davom etsa (yoki yangi nizolar chiqsa), bo‘g‘ozdagi «muammoli hududlar» masalasi kun tartibiga chiqadi.
Vazirning ta’kidlashicha, Turkiyaning pozisiyasi vaziyatga qarab o‘zgarishi mumkin. Agar mintaqada harbiy harakatlar qayta boshlansa, Anqara o‘z milliy manfaatlari va xavfsizlik sezgirligidan kelib chiqib, boshqacha pozisiya tutadi.
«Bu masalaning ayrim jihatlari tashqi siyosatimizga mos keladi, ayrimlari esa yo‘q. Prezidentimizning bu boradagi pozisiyasi qat’iy va aniq», — deya xulosa qildi Hoqon Fidan.
O‘zbekistonlik ikki futbolchi Portugaliya klubiga yo‘l olmoqda
Hakam: Husanovga qizil kartochka ko‘rsatish kerak edi!
"Real" Chempionlar ligasida ikkinchi bor g‘olib bo‘ldi
