Tramp: "Putin G‘azodagi tinchlik rejasini qo‘llab-quvvatladi"

AQSh prezidenti Donald Tramp Rossiya prezidenti Vladimir Putin G‘azo sektorida o‘t ochishni to‘xtatish kelishuvini qo‘llab-quvvatlashini bildirdi.

"Ko‘pchilik davlatlar bu rezolyusiyalarning barchasini qabul qildi, har bir davlat ishtirok etmoqda. Eron qo‘shildi - men buni ko‘rganimdan juda xursand bo‘ldim, bu men uchun katta sharaf bo‘ldi. Rossiya qo‘shildi va Prezident Putin buni to‘liq qo‘llab-quvvatlaydi", - dedi u jurnalistlar bilan suhbatda.

Eslatib o‘tamiz, 2 oktyabr kuni "Valday" munozara klubining yalpi majlisida Vladimir Putin Rossiya Trampning G‘azo sektoridagi mojaroni hal qilish bo‘yicha taklifini qo‘llab-quvvatlashga tayyorligini ma’lum qilgan edi. Rossiya rahbari, shuningdek, suveren Falastin davlatini yaratish Yaqin Sharqdagi vaziyatni tartibga solishning muhim jihati bo‘lishi kerakligini ta’kidladi.

XAMAS va Isroil Trampning G‘azo sektori bo‘yicha tinchlik rejasining birinchi bosqichi bo‘yicha kelishuvga erishdi. Amerika rahbarining rejasi garovga olinganlarni ozod qilish, Isroil qo‘shinlarini G‘azo sektoridan bosqichma-bosqich olib chiqib ketish, gumanitar yordam yetkazish va xalqaro kuzatuv organini yaratishni o‘z ichiga oladi.