Tramp: "AQSh Erondagi voqealarga javob berishni jiddiy ko‘rib chiqmoqda"

Qo‘shma Shtatlar Erondagi voqealarga, jumladan, kuch ishlatishga qandaydir javob choralarini jiddiy ko‘rib chiqmoqda.

AQSh prezidenti Donald Tramp bu haqda Florida shtatining Vest-Palm-Bich shahridan Vashingtonga yo‘l olgan samolyotida jurnalistlar bilan suhbatda aytib o‘tdi. U yerda dam olish kunlarini Mar-a-Lagoda o‘tkazayotgan edi.

"Biz bu imkoniyatni ko‘rib chiqmoqdamiz", dedi u Erondagi voqealarga, jumladan, harbiy harakatlar qilishga jiddiy munosabat bildirayotgani haqidagi savolga javoban.

Oq uy rahbari shuningdek, Vashington Eronda internetga kirishni tiklashi mumkinligini ta’kidladi.

"Biz internetni qayta ishga tushirishimiz mumkin. Bu mumkin", dedi u va bunga Elon Maskka tegishli Starlink terminallarini Tehrondagi rasmiylarni chetlab o‘tib, Eronga joylashtirish imkoniyati ham kiritilganini qo‘shimcha qildi. "Biz bu haqda Elon Mask bilan gaplashishimiz mumkin. Menimcha, siz bilan gaplashib bo‘lgach, unga qo‘ng‘iroq qilaman", deb ta’kidladi Tramp.