Toshkentning tabiiy ventilyasiyasini yaxshilash uchun ayrim binolar qavati kamaytiriladi

Prezident farmoni loyihasiga ko‘ra, Toshkent shahrida shamol yo‘nalishlari va tabiiy ventilyasiya koridorlari aniqlanadi. Shu asosda ayrim binolarning qavatlari pasaytirilib, ochiq maydonlar tashkil etiladi.

Urban digital twins orqali shamol to‘xtab qoladigan hududlar, shamol tezligi va yo‘nalishiga ta’sir etuvchi omillar o‘rganiladi. Maqsad — shaharda shamol tezligini 25% ga oshirish, havo ifloslanishi va PM2,5 to‘planadigan kunlar sonini kamaytirish.

Shuningdek, yoz faslida ko‘chalarda havo haroratini 0,5–1,5°S ga tushirish ko‘zda tutilgan. Jamoatchilik uchun onlayn shamol xaritasi ishga tushirilib, natijalar asosida shahar bosh rejasiga o‘zgartirishlar kiritiladi.