Toshkentda tramvay liniyasi qurishning texnik-iqtisodiy tomonlari o‘rganiladi

2025 yilga mo‘ljallangan Davlat dasturi loyihasida jamoat transportining ekologik toza yoqilg‘iga o‘tkazilishini jadallashtirish choralari belgilab qo‘yilgan. Jumladan, 2025 yilning sentyabriga qadar xalqaro moliya institutlari mablag‘lari hisobidan Toshkent shahrida tramvay liniyasini qurish loyihasi bo‘yicha texnik-iqtisodiy asoslar (TIA)ni ishlab chiqiladi. Shuningdek, Toshkent shahri jamoat transporti uchun 200 ta elektrobuslarni hamda ular uchun quvvatlash uskunalarini olib kelish hamda Nukus (50 ta), Samarqand (250 ta) va Namangan (50 ta) shaharlari jamoat transporti uchun jami 350 ta elektrobus, ular uchun quvvatlash uskunalarini xarid qilish loyihalarining texnik-iqtisodiy asoslarini ishlab chiqish reja qilinmoqda. Bundan tashqari, «Urganch-Xiva» yo‘nalishiga yangi 10 ta trolleybus xarid qilish choralari ko‘riladi.