The New York Times Trampning uchinchi prezidentlik muddati yuzasidan bergan bayonotlari haqida turli taxminlarni ilgari surdi

Nashr Donald Tramp nima uchun suhbatlarda AQSh Konstitusiyasiga zid ravishda uchinchi prezidentlik muddati ehtimolini inkor etmayotgani haqida turli versiyalarni keltirdi.

"Trampning bunday gap-so‘zlari odamlarni noqulay holatga soladi. So‘l qarashdagi odamlarning jahli chiqadi. Shuningdek, bu boshqalarda Tramp kutilganidan ham uzoqroq vaqt hokimiyatda qolishi haqidagi fikrni yuzaga keltiradi. Tramp odamlarni noqulay his qildirishda juda muvaffaqiyatli", — deya izoh berdi respublikachilar strategi Deyv Karni.

Respublikachilar partiyasining yetakchi vakillari Trampning 2028 yilda qayta saylanishi ehtimolini rad etishdi. Senatdagi ko‘pchilik yetakchisi Jon Tyun Tramp "shunchaki bundan zavqlanmoqda" deb hisoblaydi. Vakillar palatasidagi ko‘pchilik yetakchisi Stiv Skaliz esa, prezident jamiyatda bahs-munozara uyg‘otishga harakat qilayotganini aytdi.