Termizda yopiq temir yo‘l kesishmasidan o‘tmoqchi bo‘lgan Gazel poyezd tagida qoldi

Surxondaryo viloyati Termiz tumanida temiryo‘l kesishmasida Gazel kichik yuk mashinasi ishtirokida YTH sodir bo‘lgan.

Kun.uz manbasining ma’lum qilishicha, hodisa kecha 2024 yil 28 sentyabr kuni kunduzi ro‘y bergan.

Yo‘lovchi poyezdi o‘tishi sababli temiryo‘l kesishmasi avtomobillar harakati uchun yopilgan paytda Gazel mashinasi qoidalarni buzgan holda kesishmadan o‘tib ketishga uringan.

Shu paytda kesishmada avtomobillar harakatini to‘suvchi metall to‘siq ko‘tarilgan va Gazel unga urilib ag‘darilib tushgan.

Shu paytda kesishmaga yaqinlashib qolgan poyezd lokomotivi ag‘darilgan mashinaning kuzov qismini bosib to‘xtab qolgan.

Manbaning ma’lum qilishicha, Gazel tuman elektr tarmoqlari korxonasiga tegishli bo‘lgan va hodisada hech kim halok bo‘lmagan. Faqat Gazel haydovchisi tan jarohati olgan. Hodisa tufayli yo‘lovchi poyezdi bir muddat to‘xtab qolgan.

Hodisa yuzasidan ma’lumot olish uchun Surxondaryo viloyati IIB YHXB axborot xizmatiga yuborgan savolimiz javobsiz qoldi.