Shveysariyaning Alp tog‘larida milliarderlar uchun yer osti omborlari qurilmoqda

Shveysariyaning Alp tog‘larida badavlat mijozlar uchun xavfsiz yer osti omborlari qurilmoqda. Yer yuzasidan 100 metrdan ortiq chuqurlikda joylashgan bu omborlarda oltin, pul, san’at asarlari va qimmatbaho mashinalar saqlash mumkin bo‘ladi, deb xabar beradi BILD. Loyiha biznesmen Tomas Gasserga tegishli Shveysariyaning Brünig Mega Safe AG ​​kompaniyasi tomonidan amalga oshirilmoqda. Qurilish ishlari shu yilning yanvar oyida boshlangan. Kompaniya vakili Xugo Shittenxelmning so‘zlariga ko‘ra, qo‘riqlanadigan hudud qurilishining asosiy bosqichi yakunlandi. Birinchi omborlarni 2028 yilga qadar tayyor qilish rejalashtirilgan. Bitta omborning narxi 1 million yevrogacha yetishi mumkin. Mijoz undan 99 yil davomida foydalanish huquqini oladi. Dastlabki shartnomalar allaqachon imzolangan. Tog‘ ichida jami 20-25 ta alohida omborxona jihozlanishi rejalashtirilgan. Ulardan foydalanish huquqi yer kadastrida ro‘yxatga olinadi. Shuning uchun bu inshootlar oddiy bank seyfidan ko‘ra ko‘chmas mulkka o‘xshaydi. Loyiha mualliflarining ta’kidlashicha, omborlar o‘g‘irlik, hujumlar va tabiiy ofatlardan himoyalangan. Kirish ko‘p darajali xavfsizlik tizimi orqali amalga oshiriladi. Tomas Gasserning so‘zlariga ko‘ra, qo‘riqlanadigan hududga kirish uchun tashrif buyuruvchilar bir nechta darvoza va nazorat punktlaridan o‘tishlari kerak.